我阿爺係豬肉佬，聼老豆講每日都可以賣三隻豬以上，但係佢非常爛賭，經常賣晒就返鄉下賭，啲賭友一知道阿爺返鄉，就捉定鷄㓥好等阿爺返去。舊式麻將打法係一家賠三家，即係一家出冲三家要賠，所以三家經常昆我阿爺，我阿爺經常輸清光，我阿爺會話，怕乜嘢輸晒又會揾返來！
所以到左解放後，我阿爺雖然賺錢多，但係爛賭，所以剩錢唔多，以前啲人鍾意置田置地，我阿爺卻一分地都無買，到了鬥地主分土地時，我阿爺好彩，無置田地無俾定性為地主、富農，所以我一家倖運無俾批鬥，算係塞翁失馬焉知非福既另一個現實版本！